召集番茄控！揀你啱你嘴形嘅茄湯！
番茄湯係香港人嘅至愛，不過點先算係好飲嘅茄湯，人人標準都唔同。有人鍾意杰撻撻、有人鍾意稀身啲，有人鍾意酸啲，有人鍾意甜啲，總之就各花入各眼。希望呢個post會幫大家搵到真命天茄！🍅
🍅 濃厚系
數到濃厚系，代表一定非番茄仔莫屬！每撮麵都超級掛湯，店家落咗麵豉去煲，茄湯之上有浸淡淡嘅咸味，嗌煙靭嘅讚岐烏冬食就最啱！
番茄仔
📍地址：銅鑼灣希雲街5號地舖
📍地址：九龍灣常悅道21號 EastMark 1樓07號鋪
大西北嘅朋友唔想出到咁遠，元朗嘅番茄濃湯專門店就幫到你！同樣茄湯濃到似茄蓉，雞扒啖啖肉非常滋味，包你食到超級滿足！
番茄濃湯專門店
📍地址：元朗建業街61號地下
🍅清爽系
大熱黃店番茄師兄，相對上比較稀身，飲落就無咁飽，夏天飲都完全無問題。茄湯飲落係偏甜，無茄汁嗰種酸味，非常順口天然，唔會覺得頸渴。
番茄師兄
📍地址：深水埗基隆街255號地舖
📍地址：元朗擊壤路9號金寶大廈地下4號舖
我最愛嘅出品係半島冰室，個茄湯是痴線！啖啖茄粒茄蓉，加埋洋葱煮，真係有番茄嘅蔬菜清甜。話說我爺爺以前好拿手煮茄湯，佢嘅秘笈就係落洋蔥！呢個茄湯完全係細個飲到嘅味道，食完亦無頸渴，好撚掂 🥺
半島冰室
📍地址：北角砲台山宏安道14-28號威得閣地下
開餐嘅茄湯相對上就無咁出眾，番茄通粉好大碗，勁多番茄蓉，飲落偏酸，同樣係食完完全唔頸渴，我幾鐘意。comfort food gotcha！
開餐
📍地址：灣仔僑康大廈地下C號舖
📍地址：旺角通菜街華發大廈地下
📍地址：佐敦白加士街19號地舖
🍅頂你個肺系
暫時食到唯一真係no encore，望改善嘅茄湯－四季常餐出品。個通粉實在太難食。蕃茄牛肉湯通粉，大家expect 都真係有「湯」，點知佢係杰到好似茄膏炒通粉咁。濃郁唔係問題，問題係你唔係濃郁，而係直接攞茄膏開，但又加唔夠水，搞到好似茄膏撈通⋯⋯😨 睇相發現其他人個茄通係正常，可能係我唔好彩啦～
四季常餐
📍地址：中環德輔道中88號地舖
唔知大家又有無心水呢？🙌🏻
