花見山下日式料理 (西營盤)
地址：西環西營盤第一街129號順泰大廈地下1號舖
電話：98564890
呢間呢間新開日本餐廳位於西營盤第一街，地鐵站行去2分鐘都唔使！環境舒服闊落，店員亦非常親切。主打Omakase級手握壽司、玉子燒，亦有炸物鍋物小食等等🍱午市套餐比較平，$68就有壽司八件定食，即是晚市以同區來講價錢都相宜。以下係晚餐介紹
鮮味茶碗蒸 $28
店員特別推介，望餐牌圖片都好似幾吸引～食落熱辣辣非常滑溜，有啲似熱食嘅布甸🍮調味亦啱啱好，略嫌表面有啲單調，如果加啲蔥花做裝飾就更加精緻
自家製蟹籽木魚絲玉子燒 $68
玉子燒即叫即整，大約等15至20分鐘🍳提供幾款口味選擇，包括明太子、黑松露、蟹肉等。玉子燒比想像中大份，口感鬆軟唔會好實或者好乾，裏面有少許半熟狀態，令整體保持濕潤☺️但蟹籽就唔係好多，可能食慣咗蟹籽章魚燒嘅瘋狂蟹籽份量🤣玉子燒本身值得一試
溫泉蛋牛肉鍋 $88
鍋物大小適中，裏面嘅牛肉份量都OK，不過唔算特別軟滑。裏面有溫泉蛋、大量蔬菜、菇、鳴門卷等🍥由於面層加咗啲炸蒜，湯底清甜帶點蒜香味。本身包左白飯，建議加$10轉手打烏冬，咬落煙韌夠滑！
花見壽司十貫 $238
壽司盛合包括火炙原條海鰻、北海道帶子、火炙左口魚邊、三文魚籽、原隻甜蝦、日本笹目紋甲魷魚、拖羅、油甘魚、三文魚同海膽🍣比起單點可以一次食多啲款。望住師傅新鮮手握出來，最有驚喜係原條海鰻，大大條肉質軟滑，另外北海道帶子都夠厚肉。雖然價錢比較貴、但大多刺身有返相應嘅質素！只係拖羅就薄身咗啲，油甘味唔夠香
吉列蝦四件 $38
呢度炸物嘅選擇都幾多，其他仲有炸雞、天婦羅、炸蠔、炸薯餅等等。炸蝦新鮮炸出嚟，肉質都OK唔霉，外層夠晒香脆🍤當日師傅仲特別送咗兩份甜點，有機會去開西營盤嘅朋友可以試吓呢間餐廳！
花見山下日式料理 (西營盤)
地址：西環西營盤第一街129號順泰大廈地下1號舖
電話：98564890
