點鍋 (旺角)
地址：旺角西洋菜街1號兆萬中心3樓301舖
電話：62010077
呢間火鍋放題至少幫襯過4-5次，質素滿意keep住回頭，雖然位於劣食之塔兆萬但一點也不伏❤️️餐廳更聘請聾啞人士，完全唔影響服務水準。阿祖一行3人幫朋友慶生、帶蛋糕亦不收切餅費🎂星期一夜晚去到人山人海，記得提早訂位，book枱記得表示想坐卡位，就更闊落舒服！以下詳細為大家介紹
價格及用餐時間
只有一個套餐選擇，任食2小時原價$288/位，星期一至四7折、星期五至日8折✨計埋收加一、部分湯底加錢，阿祖嗰晚埋單三個人$774，平均每人$248
湯底
提供14款選擇，基本湯底有沙爹、胡椒豬肚、麻辣、芫茜皮蛋、豬骨湯；升級湯底+$20為黑松露雜菌、蕃茄牛、冬陰功、喇沙等；頂級湯底+$50有清酒卜卜蜆，麻辣雞煲🍲揀咗四川麻辣+蟲草花雞，雙拼+$20！四川麻辣麻香適中，辣度大約譚仔五小左右唔會食得太辛苦，內裏有不少豬皮、豆卜，少許油膩🌶蟲草花雞雞件份量不少，但藥膳味不重，比較清淡。之前試過沙爹、卜卜蜆也不錯
肉類及海鮮
點湯底後會送上一碟頂級牛肩脊及海鮮盤。牛肩脊肉質嫩滑重牛味🐮另外肥牛滑牛、黑毛豬腩片、豬頸肉、雞件都係任食，肥牛不算太肥但較為薄切。海鮮並非任食、海鮮盤包括海蝦、海蜆、帆立貝、鯇魚等，份量跟人頭俾。海蜆質素非常高，肉質爽口冇沙、飽滿有汁，海蝦同帆立貝也算新鮮🦐
炸物及手工餃、丸
比起牛肉及海鮮，呢度更注重手工火鍋配料！魚皮3款口味包括金沙鹹蛋、避風塘及蒜蓉，必食「金沙鹹蛋魚皮」，每次點都新鮮熱辣炸起，香脆不硬身，鹹蛋黃甘香夠多入味，反而避風塘就只係味粉、唔太香口🐟「即炸手工紫菜響鈴卷」也是必點！另外手工餃也色彩繽粉、不少有新鮮蝦肉在內，丸亦爽彈真材實料，推介：芝士紫菜蝦蟹餃、黑松露蝦蟹餃、鮮蝦水餃、芝士墨魚丸、蝦丸、梅菜豬肉丸🥟👍
其他火鍋配料、飲品、甜品
大路嘅配料、豆品類同蔬菜都有，自己用ipad點，能夠半份半份咁嗌～可以試下佢地嘅蝦滑，食落幾爽。飲品方面都係普通嘅罐裝汽水、紙包飲品，就冇自家樽裝泡茶嗰啲。甜品有維記雪米糍同不知名牌子杯裝雪糕，叫做有少少甜嘢食下
總括來講，如果你好鍾意食肉、特別係靚牛同任食海鮮，呢間放題就未必好適合；但假如你肉未必食得太多，又鍾意精緻嘅手工火鍋配料，佢就真心不錯😊
點鍋 (旺角)
地址：旺角西洋菜街1號兆萬中心3樓301舖
電話：62010077
