蕃茄仔
地址：九龍灣常悅道21號EASTMARK1樓7號舖
電話：94548789
熬製三小時濃郁茄湯：每煲落足18kg 鮮茄！
香港人鍾意飲茄湯，由屋企老母煲嘅湯，到茶記常餐、打邊爐湯底，通通都有番茄份。喺銅鑼灣出世嘅「蕃茄仔」，由小西灣「滑蛋仔」班底主理，未租到現址之前，同其他食店分租一舖，一早一晚各不相干。當時，食滑蛋飯可是期間限定，夜貓福利。
機緣巧合，疫情間租金稍降，促使老闆阿KU決定租下銅鑼灣希雲街唐樓地舖，但舊樓始終有啲歷史，時不時就停電，空間亦相對較少。如今九龍灣新分店，比銅鑼灣店大得多，容納到近10名員工，出餐亦比舊店快，廚房依舊採開放式設計，食客安心、廚房亦能望到客人需要。
『每煲湯落足18kg蕃茄』：出面嘅茄湯我食唔慣！😤
問老闆呢煲番茄湯嘅秘訣，佢話自己嘴刁，飲唔慣出面嘅茄湯，唯有自家製足料番茄湯啱佢心意。
每朝開舖前三個鐘已開始熬製，每煲都落足18kg鮮茄，並加入味噌、麵豉等日式調味料，煮過後再攞去隔走番茄衣（PS: 所以點解大家飲唔到番茄渣～）。每煲大概可以煮到60-70碗茄湯，難怪每碗都極其濃郁，如同「番茄漿」一樣。
有網民視之如寶，越漿口越愛，有人則嫌太濃不似茄湯，有人愛其鮮甜易入口，有人嫌唔夠fresh，總之就各花入各眼。老細就坦白講，番茄本身其實無乜味，因此坊間唔少餐廳會選擇落茄汁茄膏等等，但佢哋就堅持唔會加額外嘅味精！
「我哋原先係想加入多啲日式元素，做到好似沾麵一樣，所以會比較稠身，希望做到麵條會沾上蕃茄湯汁」
至於麵底亦有相當多選擇，老細話自己最鍾意食上海麵同烏冬，「上海麵專登搵師傅落少少鹼水，令佢有拉麵嘅感覺」，鍾意有咬口嘅亦可選擇刀削麵。
牛魔王摯愛：超軟腍和牛𦟌 🐮
問老細呢到嘅招牌配料係乜，佢諗都唔使諗就話：「牛囉！」
呢碗特級牛魔王 ($128)，薄切牛肉採用牛肩胛部位，入口帶油脂焦香，和牛𦟌微微厚切，入口即化，牛味極濃！和牛肉丸彈牙有肉汁，真係牛魔王盛宴！加埋浸住湯嘅牛骨髓，成個湯都充滿着油脂香！
大熱天時未必個個想食熱湯麵，老細就推薦秘製金黃鰹魚番茄清湯配梅素麵 ($126) 畀大家～
從西灣河合租店到商場舖：舊客移民趕唔切道別
由滑蛋仔到番茄仔，阿KU嘅餐廳得到越嚟越多香港人支持，有網民更形容「好食到仆街」，但「柴小杏」街坊可算是首批兼頭號粉絲。
「以前成日會落舖，無嘢做嘛，咪一齊吹水。之後疫情，小西灣店無再開晚市，後來先知佢哋有啲人已經移咗民。」阿KU語帶唏噓。
來不及好好道別，可能係種遺憾。但阿KU希望，總有一日能與客人再在香港相聚，約定到時再一齊飲碗熱辣辣嘅番茄湯。🍅
蕃茄仔
地址：九龍灣常悅道21號EASTMARK1樓7號舖
電話：94548789
請電郵 info@meeapp.com 了解合作