台灣港店精選推薦｜台北篇🚩

台灣港店精選推薦｜台北篇🚩

以往去旅行，最怕就係耳邊充斥廣東話，令到異地風情全失。不過近年隨住香港人離散，相信不論係外遊甚至移居，大家都會更想支持同胞喺他鄉嘅努力，就等Mee帶大家睇下香港人喺台灣留低嘅腳毛喇💛

---

1. 獅鬥 cdou bar 台北港式酒吧

自從「獅鬥」喺有「台灣旺角」之稱嘅西鬥町開業，呢區嘅MK味應該有增無減：港式霓虹燈招牌、仿九龍皇帝嘅書法牆、設計成週刊《飲食男女》樣式嘅餐牌…充滿陀地次文化味道嘅風格，令到香港顧客倍感親切，又令台灣人聯想起紅極一時嘅港產片，勾起佢哋嘅興趣。

而種種盞鬼構思，就嚟自酒吧男主人，本身營運Marketing公司嘅伍號；而要打造西門町首間港式酒吧，味道同樣重要，呢方面就由伍號嘅太太Joey操刀。

例如「咖喱魚蛋」同「牛肉丸」一秒將食客送到香港街頭小販前，口感扎實、 肉汁飽滿、味道鮮甜～仲有「手作蘿蔔糕」，加入港式先會用嘅臘肉、臘腸、蝦米同冬菇，令唔少台灣客人驚艷！

兩公婆用心喺台北重現香港街頭文化，皆因一份執著，懷念過往鐘愛嘅香港，伍號直言「唔會完全成為一個台灣人」，既要接受新文化，同時要宣揚自己嘢。

同好多香港人一樣，伍號與Joey都感覺香港回歸後已不一樣，為了將來生兒育女，他們選擇離開香港，將腦海中曾經自由有活力嘅家鄉帶到另一地方。

---

2. 叁陸伍貳港式冰室

西門町內又點止一位英雄好漢。「叁陸伍貳港式冰室」嘅年輕老闆Tom曾經喺前線參與抗爭，2020年前赴台灣，一場大火燒毀原先落腳嘅「保護傘」餐廳，之後喺士林夜市巷仔擺檔，捱過學費同生活開支拮据，終於喺3年後擁有小小店面。

店名「叁陸伍貳」意義沉重：3652天，為10年嘅日數，而暴動罪嘅最高刑期，正是10年。Tom雖然避過一劫，並無忘記手足們，而佢自己喺台灣嘅新生活亦一啲都唔易。

Tom到台後唔再聯絡父母，一肩扛起生意同生活，大火後為左開鋪，不得已動用學費營運，一腳踢每日10個鐘打理鋪頭，同時撰寫碩士論文…

幸而Tom嘅努力並無白費，除左自身故事，來台幾年練就嘅廚藝，都深得台灣食客嘅支持。菜單上每款都茶記嘅必嗌之選，沙爹牛通、三眼餐肉飯、乾炒牛河、滑蛋叉燒飯等應有盡有。

為左向台灣人呈現真正「港味」，食材絕唔馬虎，叉燒由在台港人開設嘅臘味店供貨，更不惜喺香港入口余均益辣椒醬。

「叁陸伍貳」喺重重困難之中行過嚟，體現手足永不言敗嘅精神，大家到台灣，都值得專登去支持一下！

---

3. 細記港式麵包專賣店

除咗街頭小食、茶餐廳，另一種標誌性「港味」，就係我哋嘅傳統麵包。香港人覺得平平無奇嘅早餐，喺台灣人口裡，又別有新鮮滋味。

有著廿年造餅經驗嘅師傅細哥，帶住熱情同手藝移民台北，「細記港式麵包專賣店」嘅出爐唔止台灣人鐘意，甚至有日本blogger都介紹！

港式麵包講究質地鬆軟，容易入口，為此細哥不斷精心改良麵粉糰的發酵，令麵包得出具層次嘅口感。最受當地人歡迎嘅應該就係菠蘿油，細哥手法正宗，加入豬油製造獨特口感，再在菠蘿皮上塗抹蛋汁，在烤烘時自然爆裂開花（台式的多只是在麵糰上壓紋）。

細哥原本喺香港只係打工，朋友都非常反對佢中年創業，但細哥不甘埋沒好身手，決定到台灣一闖放手一搏。佢憑住一支AK47⋯呀唔係，係憑住蛋撻、雞尾包、雞批同沙嗲牛肉包等，去開拓佢嘅夢想，用港式麵包嘅香氣征服台北街巷，亦讓所有離鄉港人搵到一點回憶嘅氣味。

---

喺台灣仲有好多香港人努力緊，一篇介紹未能盡錄，請大家期待我哋未來更多推介文章

去到台灣，記得支持一下香港人鋪頭💛