【Renews】專訪周小龍：Chickeeduck今日完全結業🐤 「相信員工支持與香港人同行」

【Renews】專訪周小龍：Chickeeduck今日完全結業🐤 「相信員工支持與香港人同行」

高峰期有十多間分店的 Chickeeduck，最後一間銅鑼灣分店，今日（6 月 30 日）最後一日營業，網店亦結束營運，這個有 33 年歷史的本地品牌將正式結束，箇中原因不言自明：老闆周小龍高調支持反修例示威，滿店的新民主女神像、連儂牆和標語，令這家中小企不見容於政權和大業主，最終被迫結業。

「絕對係無後悔，你俾我行多次，我都係咁行，因為我唔會知道今日結果係咁樣。」去年底到英國生活的周小龍說。雖然無後悔，但不代表他完全沒有負面情緒，特別是對曾經的上百名員工，「到最後階段，得返幾日，有個好怪嘅感覺，之前逃避去思考，夠竟我有無辜負咗人呢？」

「你叫我俾建議未來香港一個小商人、中小企，我一定唔會建議佢好似我咁做，即係叫佢去死。」

---

周小龍提到的辜負，指向的對象是他的員工，由曾經的過百人，一路減少到現在餘下六個人，「我就諗其實係有嘅，的的確確事實擺在眼前呢，100 鬆啲人係因為我失業嘅。」

回看過去這幾年，Chickeeduck 每次見諸報端都不是好事，舉凡不獲商場續約、國安搜舖、到內地工廠受壓無法出貨無貨賣，一步一步將 Chickeeduck 推向死亡，或者如周小龍早前所言，無謂繼續掙扎。

「好多人話，『周生多謝你犧牲』，我會即刻否定佢。」周小龍說，自己在 55 歲「覺醒」決定站出來，當時絕對不是以一個「自焚者」的心態，「當時係真係諗住會成功」，希望可以做到一個例子，鼓勵更多中小企發聲，後來參選立法會，還成為了唯一一個選舉延期前入到閘的民主派，只是最終發展事與願違，「作為一個商人嚟講，我盤生意真係無咗。」

「所以亦都唔想講一啲，贏到香港人支持嘅老土說話。」他認為他自己的經歷，反映了政權和大商家的態度，與其被人感謝，周小龍反而希望，他的例子可以作為後來者的參考，

「今時今日，叫做靜雞雞，都要生存到，身邊嘅人跟你搵到食，先可以鬥落去。」

但由他站出來的一刻，周小龍似乎已經失去了低調這個選項，又或者是他自己的性格讓他拒絕沉默。2021 年 5 月，數十名警員和國安警，搜查 Chickeeduck 荃灣分店，周小龍說自己當時非常忿怒，「諗住拎枝區旗插喺個民主女神度」，結果反而是員工勸阻他，「國安即刻拉你㗎！」

「咁員工有無怪責你？」

「佢哋好體諒，我唔覺得我呢班同事，會唔同意我支持民意、支持香港人。」

周小龍說，他相信 action speaks lounder than words，對於他的員工，除了思考自己是否有所虧欠，他只覺得尊重，「嗰 100 人入面，我諗唔到有邊個主動話，要辭職要走人。」即使遇過國安上門、各式阻撓，「無同事即刻遞信，話唔得阿爸阿媽唔俾我幫你打工，無。」

「我係非常之好彩。」

---

過去這四年，一直見證周小龍這段旅程的員工，今日最後一日開店，「之後大家各行各路啦」，周小龍自己，亦走上了另一段人生旅程，展開在外地的生活，「但我唔會一句答咗你，話而家好開心自在。」

不快的原因，除了家人不在身邊，還有很多周小龍的朋友，正在香港失去自由，例如戴耀廷、鄒幸彤，「我同鄒幸彤、周冠威，一個月有個周（鄒）氏午餐，喺佢中環 chamber 附近食晏，原本準備叫埋同鄒家成，點知嗰個禮拜，鄒家成就俾人拉返入去。」

周小龍說，當時他無論和戴耀廷，抑或鄒幸彤聚餐，都會選在最光明正大的地方，「我同 Benny 食飯，專登揀 Landmark個cafe，無頂嘅，行過都見到。」

不過想當然，周小龍在英國亦有自己的生活，「我又未去到，喺英國食餐飯都好罪過咁」，他閒時會打高爾夫球、打網球，但他亦明白自己現時仍然自由只是幸運，「因為初選一網打盡，主力係打五區嘅人，如果佢要抽埋你功能組別，我都中招。」

那是否已做好心理準備，不再回港？周小龍說，不是。「我自己好固執地，唔覺得自己返唔到嚟香港。」

所以，周小龍一直都強調自己不是「移居」，而是在英國做生意、找商機，「香港無商機，我咪 travel between 英國、美國搵商機，我唔叫佢定居啦」，他亦一直堅信，自己沒有案在身，只要有需要可以回港，例如他指自己有一宗作為民事案的原告向對方索償，但對方向法庭指稱他潛逃無法完成法律程序，「真係開庭，我咪返黎出庭作證囉，我嘅脾性就係，你大我，我返嚟囉。」