🐉一年過咗一半，又到咗大啖食粽嘅時候喇！
Mee一如以往，為大家推介多款良心小店嘅靚粽，材料上乘、風味極佳就不在話下，最重要係堅持「本土製造」—— 香港人，梗係食香港糭😌
1. 五味匣子
由登堂私房菜，做到食品硏發，【五味匣子】一直將餐廳級菜餚送到家中桌前，佢哋嘅端午糭當然都唔馬虎啦。
多款手工糭用上黑豚腩肉同原粒北海道瑤柱，今年亦新增幾種口味，如加入日本岩手縣產櫻花蝦，或15年新會老陳皮等，碰撞出豐富新鮮感，新品「一品鮑魚裹蒸糭」，更加係珍饈美味，十分矜貴。
（5款端午粽+附送蝦苗蒜香辛辣醬+禮盒及保溫袋）$368
訂購禮盒裝更附送「秘製蝦苗蒜香辣醬」一樽，令糭子更添辛香，享受更昇華！
2. 徐記點心廚房
鐘意食甜嘅小編求左幾年，今次我哋終於有梘水糭賣喇！我哋搵嚟專營港式點心嘅【徐記】，徐媽媽同老師傅嘅製作，絕對係用心又窩心，深受街坊歡迎～
就好似佢哋嘅「蓮蓉梘水糭」，口感煙韌，餡料滑溜甜香甜。仲有晶瑩透亮嘅「西米糭」系列，粘糥微甜，令人生津回味！
咸糉亦有「蘆兜粽」同「綠豆鹹肉粽」選擇。
3. 到家元朗
一直將各式蔘茸海味，精繳湯水及時令餸菜送到你家嘅【到家元朗】，每年嘅端午糉都絕對令人大滿足！
份量十足嘅「櫻花蝦鮑魚元貝至尊糉」選用瑤柱，加上魚肚、乾鮑等豐富材料，米粒更跟大量日本櫻花蝦混在一起，用料矜貴，自用以外，送禮一流（今年只會限量製作1,000隻，有買趁手！）
另有行清淡路線，多食都唔怕膩滯嘅「高纖五穀糉」。
4. 候鳥 ⭐️
端午節嘅意義，本來就係守護為家園犧牲嘅先行者，而【候鳥】則希望看顧牆內手足在外的親人。
今年候鳥將推出「蛋黃鹹肉糭」、「豆沙鹼水糭」，仲有非常足料嘅「瑤柱鮑魚裹蒸糭」，亦將會為認識嘅在囚手足親友贈送每個家庭一套三款糉子，希望透過贈糭，傳達看顧和守護的心意。不管多艱難的環境，仍會守護手足和家屬。
糉子暫以預售券形式發售，產品實物於6月跟大家見面。
5. 齋啡 Vego Coffee
邊個話食糉係重口味同食肉獸嘅專利？【齋啡】推出嘅素糉，絕對係應節同健康兼具嘅選擇！
全人手香港製造嘅「純素粳米糉」，以粳米、糙米、紅米取代糯米，並以粟子同紅綠豆做餡，不含五辛。除左素食者，仲好啱痛風患者，有補脾胃養五臟嘅功效，十分健康
唔好等啦，立即訂購小店靚糉！