專訪周冠威：成功面世《一人婚禮》已是突破「唔好睇死香港」🎥

「最後《一人婚禮》出到嚟，就已經係一個突破。」

周冠威 電影導演
作品包括《十年》《幻愛》《時代革命》

周冠威新作、杜汶澤作為主要投資者的《一人婚禮》，星期四正式上映，要在不劇透下介紹這部電影，很難，因為它處處都是「驚喜」，「係驚嚇定驚喜，真係因人而異。」周冠威帶著笑意說。

若果帶著看「賀歲」「青春」「合家歡」「愛情小品」的預期入場，《一人婚禮》愈到中後段，愈不是那回事，網上在優先場後都出現了一些非常尖刻的批評，說是鬧劇一場，有份參演的王宗堯就說，電影「本身真係一場鬧劇」、「鬧劇背後，大家攞到啲咩走，先係最重要。」

「你叫我完全從商業片角度，但去到後面，佢完全唔係好商業片，係咪好藝術片好文青呢？又唔係。所以我覺得，好多邊都不討好。」這部戲本身未必完全符合觀眾期望，周冠威不是不知，甚至有點故意為之，周冠威自己形容，這是部「任性」「有個性」的電影。

這不是說《一人婚禮》不好看或是爛片，而是很難去定義，因為它和預期相差太遠，例如，在周冠威眼中，《一人婚禮》是和政治完全無關的電影，「真係 totally 無任何政治上嘅一種象徵，或者擦邊球。」

周冠威喎、杜汶澤喎，《自焚者》和《時代革命》喎，現在去拍一套完全不帶政治含意的電影，真？「如果我要 please 觀眾，其實我應該擦邊球」，但事實是他稱沒有，「我唔覺得擦邊球係好事，我係明刀明槍嘅人，《時代革命》就係明刀明槍，我拍完《時代革命》仲需要擦邊球？我唔需要㗎啦。」

所以今次不是政治寓言，不是精神病苦戀，「但我 welcome 任何解讀，作者已死嘛」，《一人婚禮》是周冠威純粹地去探討如何愛自己、忠誠面對自己的電影。

本應如此。但你不碰政治、政治都會找上你，特別是當你叫周冠威，拍過《時代革命》。

入場看《一人婚禮》，最先「震撼」觀眾的，是 open credit 多達數十人的聯合出品人名單，除了杜汶澤和王利民算是公眾人物，其他的都不是電影公司，甚至有不少一看就知是化名的「投資者」，與其說是電影 credit，更像東華籌款畫面底的 roller，「全部都係兩脅插刀，佢哋真係唔係純投資賺錢，唔係大有錢人，都係我朋友。」

900 萬製作成本，要靠朋友每人十萬八萬集資拍戲，原因是《時代革命》風波後，《一人婚禮》原本的投資者走得七七八八，餘下一個杜汶澤，「佢話我唔走，真係義氣仔女﹐咁多人離我而去，佢唔走」，結果就要靠幾十人「東華籌款」才湊夠數，「有位係『手足』嚟嘅，佢而家坐緊監，佢決定投資嗰時都講，『我有 case 將會開審，未必睇到套戲﹐但係我好想投資落你度』」。

錢是困難，要找演員亦是難，攤開《一人婚禮》演員名單，主要陣容絕大部分都是經驗較淺的新演員，掛帥的阿冰亦不算是大 cast，周冠威透露，除了阿冰演的女主角是他本來就屬意的人選，男主角 Dickson（陳健朗），三名要角樂儀（盧巧音）、Charles（黃寶漳）、子浚（唐浩然），全部都不是原有陣容，「一個都唔係，係搵咗好耐演員，一路搵好多人都推推推。」

連最後一場重頭戲－一人婚禮出場的數十人，都有不少是義工，「有啲臨時演員將會坐監，知我搵緊臨時演員，想有啲義工，佢哋就嚟幫吓手。」如是者，《一人婚禮》就在這個人又無、錢又無的困境下誕生。

而這一切都在周冠威的預期之中，於他而言，這些不是《時代革命》帶來的後果，而是早在拍《自焚者》時，他已經「豁咗出去」，「我老婆當時都嬲咗我，一段好短嘅時間。」

「但係佢匿入房祈完禱，問我呢個係咪神所喜悅嘅，我話呢套戲係講誠實、公義、講犧牲。『咁你拍啦』，我哋認真同天父承諾過，一生追求妳，追求到底。」

《時代革命》之後，有朋友勸告周冠威「你一定坐監、你一定無戲拍，你唔好咁」，亦有朋友覺得「他一定無事」，但周冠威覺得，不必「睇得太死」﹐「我都唔好睇死我自己，唔好睇死一定有個咁嘅阻礙，《時代革命》一定會導致《一人婚禮》嘅製作腰斬。」

「我對香港將來，都係懷住一個咁嘅盼望，你唔好睇死香港。」

之後的，就留給電影來說話，不必賣悲情感傷，周冠威期望，觀眾可以放低對他、對政治等等的預期，純粹入場觀賞一部電影，正如他都是純粹地拍戲，「套戲唔屬於我，而係屬於觀眾，佢要柴台、追捧、獲得喜悅，或者睇完想講粗口，都無問題。」

「之後我想繼續搵資金、搵演員拍戲，拍一套關於學童自殺嘅電影。」

Do Your Best and Let God Do the Rest，或者就是周冠威這些年面對種種逆境的態度，用一個不這麼宗教的說法，就是平常心，「保持自己心靈健康，你做你自己，維持正常。」他的正常，就是留在香港，說應該說的話，繼續拍電影，「喺香港直接面對呢份恐𢣷，先係真正自由。」