何車車仔麵
地址：太子界限街41C號長勝大廈地舖
電話：94548789
呢間良心車仔麵店，店內位置唔係好多，出餐時間亦比較慢，想食記得避開繁忙時間
💕麵底 $10-$15
呢度除咗一般嘅車仔湯麵、最特別係各款口味撈麵，包括蝦子撈麵、黑松露撈麵、咖喱撈麵等等🤩蝦子撈麵 $15蝦子分量超多，覆蓋晒全部餸，食到最後一啖都有👍🏻幼麵夠爽口！蒜油麻辣撈麵 $15麻辣味超香唔會多個死辣，但粗面口感就硬身啲🌶另外所有配料都可以免費加蔥、蒜蓉、麻辣油等等，必試佢哋嘅麻辣油，令麵更加惹味。想健康啲唔想食咁多澱粉嘅、仲有得揀各款菜底！
💕車仔麵配料 $8-$15
雖然呢度嘅餸價錢比較貴，份量唔係好多，但質素有保證！接近40多款選擇，同朋友點咗陳皮魚蛋、魚腐、糖心蘿蔔、燒豬頸肉同手撕雞😻 陳皮魚蛋嘅陳皮香好重，加埋大量蝦子味道好夾。糖心蘿蔔都係必點，入口軟淋冇渣，但就細件咗啲唔夠滿足
💕炸物小食 $15
呢度嘅炸物反而幾平一律$15，包括炸雲吞、黑松露薯條、吉列炸蝦、絲網春卷、炸蠔等。試咗炸媽媽餃子3件，新鮮炸起外皮夠晒脆、唔會太厚，裏面菜肉均勻，不會太油膩🥟想食特別啲嘅車仔麵，記得試吓呢間！
