【是命 也是選擇－陳朗昇離港前專訪】

【是命 也是選擇－陳朗昇離港前專訪】

「而家係困難嘅時候，我哋更加需要，可以嘅話繼續留喺度睇住，或者再努力啲去做。」

「唔係一定要係我，其他人做啦、或者你做啦？我只係問自己，想唔想，我想。」

「你話咁樣好戇鳩，都無錯嘅，但係有人鍾意選擇戇鳩，咁你由佢啦。」

陳朗昇 香港記者協會主席

＊＊＊＊＊

9 月 29 日﹐香港國際機場，在數十記者的鎂光燈下﹐陳朗昇登上前往英國的航班，到牛津路透新聞機構深造半年﹐但有別於不少離港的人，本身有案在身的陳朗昇言明必定回港，而只要對他有點基本認識，都應該相信他絕對認真，「由 Day 1 已經諗住返嚟，就算無單 case。而家有 case 就更加要返嚟。」

而一如所料，他離港報道的留言，幾乎都填滿「走啦！」「唔好返嚟」的留言，類似的去留問題阿昇答過很多遍，他的答案都是必定會回來繼續做記者。

「你有無想像過，唔係做記者嘅自己？」

「無，真係無。」

確實，由 04 年樹仁新聞系畢業就入行，十八年來前後做過十多間公司，阿昇從來都無離開過傳媒界，到英國都是在傳媒研究機構深造，回港繼續做老本行，順理成章，「如果我喺英國做記者，係報英國事定香港事？如果報香港事，我梗係留喺香港啦。」

但現實是，現下在香港做記者，還要做記協主席，是壓力、風險，阿昇過去這一兩年的遭遇、以至他能順利離境會都會成為新聞，已經是明證，「係嘅，走係一個合理選項。」

不過若果回望前塵，陳朗昇不應該要走到懸崖邊。

雖然現在被黨媒稱為「亂港份子」，但其實阿昇作為一個港聞記者，出身根正苗紅，2007 年，經歷畢業頭三年的起伏，他加入《文匯報》做了兩年多港聞記者，「老師話文匯港聞有位，若果讀書嘅時候梗係唔想去啦，但經歷浮浮沉沉之後，好想做港聞，即刻仆去做。」亦是在《文匯報》，他因為對警察新聞感興趣入了「保安 beat」（專門跟進各紀律部隊動向），「好快啲警隊管理層，都會記得吓你，同佢哋食吓飯傾下了解吓。」

這種和警隊密切溝通、良好互動的關係，一直持續了十多年，期間他去過《成報》、《Factwire》、《立場》，都無改變，「19 年仲同警察踢緊波，friend 到嚇死你，仲去過警察學院分享，講記者喺前線想做咩。」

「無論背景、出身，對警察認識各樣，都唔係想係咁嘅結果，但最終係咁，唔考究啦，命運啦。」

命運，往往很喜歡開玩笑，2019 年，命運讓陳朗昇的人生翻天覆地，他任職的《立場》，由一家只有 12 人朝不保夕的小型網媒，一躍而成主流；而陳朗昇在現場別樹一幟的直播風格，則令他由行家口中的「阿昇」，變成了公眾認知的「昇哥」，「係幾意外…因為立場啲直播又朦又朧，器材又差，開咗又唔想熄，唯有係咁講嘢，東拼西湊所有嘢有關就講，點知啲人愈聽愈鍾意。」

同樣地，阿昇另一個廣為人知的身份－記者協會主席，也可以說是命運。

時間回到 2018 年，陳朗昇重回記協當執委，「最先一開始係因為唔夠人」，直白一點，當初他主要是幫忙「湊人數」，這在尚算太平盛世時的職工會中並不出奇，那時做記協，風險近乎零，「無危險㗎從來都，都係新聞自由議題，都係講，唔得咪上街最多，可以點。」

但短短一年之後，社會劇變，記者被推上風尖浪口，和警察的矛盾愈見尖銳，要找人「接莊」難上加難，「數吓數吓環顧四周，做前線年資比較多嘅人，（執委會）其實淨返我，結果就我做咗副主席，後來就做咗主席。」

於是似乎就這樣，陳朗昇被命運推到一個從未料想的位置。

真的是這樣嗎？「一半一半啦。」

時代的巨浪中，順流裡站上沒料到的位置，是命運；但在逆流下，繼續挺立，就是選擇，「企喺呢個位，你面對到、承受到咪繼續頂囉，我覺得自己承受到。」

離開的機會一直都有，在香港做記者本來壽命就不長，「我從來都認，作為記者我唔出色，同埋好論盡」，但十八年過去，和阿昇同代他形容比他優秀的記者，大都一一轉換跑道，但他沒有；今年七月記協換屆，在公民社會萬籟俱寂、記協成眾矢之的時，不積極尋求連任的陳朗昇，連任記協主席；去年年底《立場》被查禁，自身都要協助調查被帶返警署的阿昇，小休後加入 Channel C 繼續跑前線。

「我嘅優點係咩？堅持囉，咬住呢行唔放。」

「呢個社會始終需要真相同資訊，都係睇時勢，可能而家有啲嘢會敏感啲，大家要小心啲，但係時勢會變㗎，咁咪等，等到一個時勢，再用得返我哋全套功夫。」這份堅持背後，是阿昇享受過的黃金歲月，那個曾經自由的香港，他希望將他在這城這業得到過的，盡量留下一些給後來的人，「你話留喺度係咪有好大貢獻？唔係，但仲可以幫到呢個行業小小，都留啦。」

他放不下的，還有那些在烽煙中和他一同努力過、而今被關在鐵窗後的上司和同事，離港前見記者，他一度哽咽，後來阿昇說，他本來想說但講不出口的，是他很想念他們，「佢哋受緊，我唔做記者，唔得。」

值得與否、是否必須由他去承擔這些責任，阿昇都說他不會思考太多，他只會問自己一個問題，「想唔想？我想。」然後他說，這樣做他得到的回報，微小而巨大，就是心安。

「你話咁樣好戇鳩，都無錯嘅，但係有人鍾意選擇戇鳩，咁你由佢啦。」

後記

話說，寫阿昇，很難，難在太過熟悉，似曾相識的對話，在辦公室在街頭，反覆說過聽過很多遍，還是寫寫鳩嘢容易點。

講到戇鳩這議題，阿昇一如所料滔滔不絕，提到他小時候和父親到南京參觀雨花台烈士館，「你話我咩都好，你唔可以話我唔愛國」，拉到他最愛讀歷史、特別是近代史，講到其實歷史上有很多人「戇鳩到飛起」，而其中「塵世間最戇鳩」的，是「彭楊帆」－不是一個人，而是三名烈士，「辛亥革命成功之前，俾清廷斬頭嗰三件友，佢只要捱多幾個鐘，佢就係革命英雄。」

「但係佢哋捱唔到，就俾人斬咗頭。」

本來想過去問，你覺得自己又捱得到嗎，但想想還是不了，你懂的。順帶一提，人家其實是「彭劉楊」三烈士。

多喝水、戒可樂，半年後，我們戰場見。