盤點「家超語錄」💬

新任行政長官李家超「復新」(此非錯字,稍後解釋)六天,即到立法會出席第一場答問大會,ReNews 特意盤點「家超特首」語錄,方便市民好好學習,天天向上。


「點解好似香港唔係咁成功,係我哋唔主動將我哋成功故事提醒返自己。」

答問會其中一個焦點,是政府如何講好「香港故事」,李家超提出一個哲學思辯,即香港不成功,是因為香港無主動提醒自己成功。

另外涉及這議題的精句尚有(但不限於)

「但係世界上面,我哋雖然係君子,但係好多小人。」

「我哋唔可以仲諗住,有麝自然香,有時仲要做到畫公仔畫出腸。」

李家超指,香港面對國際社會抹黑,必須做好對外解說的工作,包括派人到海外,因為「seeing is believing」,要將香港的成功「重複地講」,「大家就變得因為我哋係香港而驕傲」。


「喺我過往經驗,政府工作40多年,往往我覺得領導去參與去過問去管,就有結果㗎啦。」

李家超多次強調,要「以結果為目標」強化管治,他的「領導方式」是要求司局長在問題萌芽時主動介入,而以他經驗,只要「領導」盡早介入就會有結果。


「呢個政策組我心入面已經有咗個名,就係叫做特首政策組,點解係特首政策組,唔係行政長官政策組?」

有議員問他是否會重設「中央政策組」,李家超如是回應,他進一步解釋。

至於何以叫「特首政策組」?

是因為他作為特首的角色,第一要向中央負責,亦要向香港負責,他不單是行政長官,亦要有國家視野、照顧香港整體利益、審視國際形勢,所以「特首政策組」是「宏觀性政策決策單位」。

關個名咩事?明就明,唔明,我都唔明。


「我有十五個局…我呢十五個仔仔女女,如果我講某個局,人哋就話我忽略另一個局。」

李家超被問到,預視五年後他最自豪是那個範疇,他如此回應,又指他作為行政長官的獨特角色「其他人無」,就係他要同時向中央和香港負責,「如果我做好呢個角色就係做好行政長官」,而他十五個「仔女」,他希望都可以「獨當一面展翅高飛」。


他又被問到如何改善勞工福利,例如最低工資一年一檢,由於答案過於深奧,凡人難以解讀,只能原文照錄:

「勞工嘅得益係在於整體行業發展,而導致佢有應有嘅收入,而喺佢去追求自己生活領域,如果可以做到一啲既係高增值,導致佢嘅收入多啲,同埋佢整體興趣又符合,所以點解我強調,喺我哋處理勞工福利或者保障,係應該用整體觀嚟睇,希望我哋唔好單睇行業入面嘅循環,我係希望提升到成個社會嘅循環 ,即係話我哋喺培訓,令勞工佢更有自己技術,又可以尋找自己理想,而佢嘅待遇又因為工種嘅含金量提升,而導致佢獲得應有嘅工資,有一個好嘅工作環境,呢個係靠成個政府、成個商界、仲有學術界以及勞工界一齊嘅。」


「我舉個例,呢個係親身有人向我投訴,個投訴人係我自己。」

睇唔明不要緊,不要問、只要信,李家超又分享一個有關他聽的外判制度的投訴:

「有一個外判工作,要將花槽做返高,因為唔夠泥,但係做嘅時候知道無去水位,即係話個花槽一灘水,咁加咗個花槽高咗,梗係要有去水位,但係個去水位就加喺新加嘅花槽嗰個厚度,即係個底係無,上面中間有個去水位,呢啲就係監管方面做得唔好。」


同場加映-建制議員表現節錄

新科議員林素蔚、楊永杰,親切地稱呼「家超特首」,現場氣氛溫馨,充分顯示行政立法關係重回正軌。

另一新科議員陳月明,感謝李家超「復新」六日即到立法會答問,如無意外,意思應為「履新」。

ReNews
ReNews

解構新聞、前因後果、當中脈絡,由前《立場新聞》記者創立的一人新聞平台。

分享:

有 “ 3 則迴響 ”

  1. 冇擔當冇文化冇學識嘅人,講嘢就係咁
    家超特首未上任先犯法,仲叫法院唔好告自己,厲害了我超

  2. Errrrrrrrrrrrrrrr……..very sophisticated responses…….
    Still scratching my head trying to understand……..

發表迴響

%d 位部落客按了讚: