唔使點搭車～唔使出街食｜寶琳日韓菜黃店！
喺寶琳似乎無乜黃店，今次呢兩間算係沙漠綠洲！
新都城二期一樓永遠有條長長人龍，以為有咪華，原來係排緊韓閣！
1. 『偏近港人口味平價韓菜』
韓閣
地址：將軍澳欣景路8號新都城中心2期1015號舖
電話：28386762
人均消費：$50-$150 （下面個餐就貴少少）
餐點：二人燒肉餐 $488（外賣須三日前預訂）
燒肉餐有韓牛、五花腩、凍豆腐、帶子沙律、軟殼蟹手捲、年糕湯、芝士蘑菇釀雞翼、蒜蓉青口、甜品同飲品。先講燒肉，有辣醬、燒肉醬油同芝麻醬點，真係一定要點，因為餐廳無落鹽醃，預設大家點醬！
芝士蘑菇釀雞翼脆皮入面熱辣辣，唔使輪骨真係好爽，凍豆腐同蒜蓉青口都係無記憶點嘅正常味道，軟殼蟹手捲上面好多蟹膏，入面仲夾咗黃蘿蔔、牛蒡、青瓜，呢個組合幾好食～
帶子沙律本身以為係刺身，點知係熟帶子，但柚子醋加番茄係幾清新嘅～
成個SET老實就正常吧，488有咁多嘢食只可以話係以量取勝，過吓燒肉癮係OK嘅～ 屋企有架餐不妨考慮吓！😍
2. 『大阪風和式小食 必食麻糬窩夫』
有料案內所
地址：將軍澳毓雅里7號富麗花園地下1號舖
電話：66567186
人均消費：$50-$100
餐點：
- 炙燒焦糖布甸麻糬窩夫 $68
- wasabi明太子章魚燒 $42
- 廣島燒 $56
由屯門開到將軍澳，真係好想知究竟老細本身住邊，好飄忽㗎衰鬼！神奇就在竟然隔離枱食緊嘅，都係由屯門店食到去將軍澳😂攬攬～
唔熟將軍澳地頭，但朋友話呢到比較偏僻，被禁晚市後，佢哋開埋午市自救，寶琳友多多支持吧
章丸小丸子好大粒，上面撒滿木魚碎，咬落外皮脆口，入面有啲空心，出面個層好似咬饅頭、粉粉哋嘅質感，每嚿有一粒章魚粒，如果可以做葵廣嗰種偏流心/漿狀嘅質感會比較似日本做法～
窩夫即叫即製，60幾蚊超大碟，每塊都勁厚！炙燒焦糖布甸食落有啲吉士醬嘅感覺，估唔到同窩夫又幾夾，窩夫入面仲要係麻糬，有少少咬口同好軟糯，但就有啲飽😂 配埋雪糕一凍一熱好好食，但真係快食，唔係會腍哂
廣島燒係一層蛋、一層大阪燒漿、一層椰菜再夾住啲炒麵，基本上有蛋黃醬同燒汁都唔會輸，好惹味好香，如果可以將菜嘅比例再多啲就好！
