✨ 黑窗里 ✨

📍 深水埗大埔道79-85號民安大廈地舖
⏰ 1200-1730 | 1800-2200 週三休息

---

「黑窗里」呢個地方，其實有段好長好長嘅故事。

當年喺油麻地嘅德昌里素食合作社，廚房樓上有一個叫「黑窗里」嘅info shop，店內入面有單張、刊物、海報、雜誌⋯林林總總嘅嘢畀人取閱。

如今嘅「黑窗里」成為素食餐廳嘅名，但仍保留閣樓嘅Info shop，設有圖書閣、版畫工作室，得閒搞下音樂會、講座、讀書會、放映會，為嘅係保留一個空間，畀人放心『圍爐』。

那些年嘅「蘇波榮」，食物係自由定價，「黑窗里」嘅食物則有定價收費，但保留左其中一款主食供客人自由定價。呢到有趣之處係無特別框死要整邊一個國家嘅菜式，每日餐牌都有唔同，日韓中西印泰菜，全部都係廚師嘅拿手好戲。

---

我哋今次叫咗：

▪️ 番茄忌廉意粉 $66
▪️ Cocktail : 半眠甘菊 $78
✔️ 主食跟餐 + $28 有湯+小食

今日嘅餐湯係中式海帶海椰甘筍雪耳雪梨蘋果湯，個名長到戇鳩鳩咁，飲落就係清甜溫和嘅味道，仲有湯渣食吓，淨係為呢個湯已經會再翻兜！

意粉份量超多，一度以為會食唔晒，意粉上面仲淋咗啲綠色類似乳酪醬嘅嘢，不過當撈埋晒一齊食，浸味已經融入喺入面，又唔覺得突兀。

忌廉醬沾滿喺每條意粉嘅上面，佢哋嘅意粉係比正常粗少少，超級有咬口，好啱我口味。食落浸味有啲似肉醬意粉，但係冇肉醬意粉嗰種太鹹太重口味嘅感覺，食下食下就不知不覺食晒。

• 

• 

• 

見到甜番薯淋上自家製蛋黃醬，就醒起喺佢哋story睇過店主嘅自白：「本身諗住偷懶用BB沙律醬就算，但最後都係覺得要對得住食物同客人，乖乖地做複雜啲，整自家製蛋黃醬。」

洋甘菊cocktail亦好高質，微微清甜嘅菊花香，飲落好順口，尾尾有啲酒嘅苦勁，係適合夜晚飲嘅清爽Cocktail。

留意佢哋IG會有每日餐牌更新，可以睇咗啱唔啱食先再出發！