My Ahjussi
地址：大角咀大全街39號地舖
電話：98467315
主打西韓fusion嘅大角咀黃店，價錢比旺角尖沙咀嗰堆韓菜相宜得多，除咗炸雞薄餅意粉仲有咖啡飲！之所以會做fusion菜，老闆話有段故㗎！
我哋叫咗：
▪️ 蒜香蜂蜜炸雞 ($98/6件)
▪️ 牛油果炸豆腐沙律($78)
▪️ 韓式素牛肉飯卷 ($65)
據講係必點嘅蜂蜜炸雞，6大件全無呃秤，一對雞翼、雞鎚同雞髀，炸到金黃色、上碟時熱辣辣。我覺得佢唔太似韓式做法，反而屬偏向日式炸雞嘅上粉方法，炸皮係好脆嘅薄漿，雞肉亦醃得非常入味，肉質嫩滑，肥膏唔算多，唔會有好油膩嘅感覺，抵讚。
蒜香蜂蜜醬好似同個雞唔太撈得埋，唔知係咪同炸皮嘅做法有關，而家有啲似原味炸雞點醬，而唔係韓式炸雞嗰種融為一體嘅感覺。下次可能會試其他味！
炸豆腐亦係偏向日式嘅煮法，上咗薄薄似天婦羅嘅粉醬，咬開脆皮係嫩滑嘅豆腐，非常推薦，牛油果好靚，果肉質地細膩，沙律菜都好新鮮、配色好靚！
飯捲唔知係咪因為揀咗素牛肉，無咗平日肉嘅鹹香襯托，所以過份淡口。建議餐廳可以加芝麻/醬汁去豐富成件事！
❝ 西韓fusion菜背後的秘密 ❞
老闆TIM話揀大角咀開舖係因為想做街坊小生意，揀做韓國菜係因為見到附近競爭唔算大。至於賣咖啡嘅原因，原來係老闆以前喺社企工作時，認識當時負責水吧嘅聾啞人士BoBo，於是決定邀請佢嚟新開嘅餐廳擔任咖啡師，將韓國菜餐廳搖身一變，成為韓式咖啡店。
而家餐廳亦有聘請其他身心缺陷人士，老闆希望藉此證明佢哋同正常人一樣能勝任餐飲工作，鼓勵更多僱主聘用佢哋～ 希望大家都會多多支持啦～
My Ahjussi
地址：大角咀大全街39號地舖
電話：98467315
請電郵 info@meeapp.com 了解合作