Second Bite (長沙灣)
地址：長沙灣昌華街45號昌暉大廈地下6號舖
電話：39565441
相信唔少朋友睇咗魷魚遊戲，作為超級戲迷嘅阿祖之前都DIY過椪糖🤫冇諗過可以喺餐廳玩！位於長沙灣嘅second bite推出椪糖挑戰，玩完仲有得抽獎～
🦑椪糖挑戰
每日頭30位消費滿$300嘅顧客，一枱可獲椪糖挑戰一次✨隨機獲得唔同形狀，只要限時內成功整出椪糖，就有機會參加抽獎，獲得「韓國椪糖遊戲套裝 」或其他Second Bite大禮（全單半價、免費小食、優惠券等）🌝第一次抽到圓圈，唔使5分鐘整到出嚟✌🏻再贏多盒繼續玩，第二次嘅雨傘️真係好難搞，唔小心就整斷隻角☂連獲獎嘅現金卷都係遊戲卡片
💕廚師精選封門牛柳扒 $178
晚餐包括餐湯、蒜蓉包，+$5連飲品～封門牛柳扒冇想像中咁大份，阿祖點七成熟，中間保留粉紅色🐂肉質算唔乾身重肉味，唔使特別用力咬，不過就冇咩肉汁，似普通燒牛肉多啲～味道都OK但唔係好驚喜。伴碟連埋薯蓉、野菌同雜菜
💕椒麻美國黑豬柳扁意粉 $148
反而依個值得推介😍同樣套餐包咗餐湯餐包，上枱見到黑豬柳份量幾多，離遠已經聞到好香！豬柳肉質軟淋入味，最正係意粉嘅醬汁，夠多之外辣度強勁，啱晒鍾意食辣嘅朋友🌶味道有啲似冬陰功醬，非常開胃
💕香燒芝士流沙粟米 $58
粟米一開始原條上，粟米上面佈滿熱熔芝士同鹹蛋黃，假如唔使影相店員就會幫手切、食起上嚟好方便🌽粟米夠多就唔會燒到好乾，鹹蛋黃味比較突出，芝士味反而就淡啲，但相對冇咁膩🧀
💕特色雪糕芭菲 +$38
嗌套餐就可特價加甜品，芭菲包括兩球雪糕，上面係士多啤梨醬、下面係朱古力醬🍨味道正正常常，雪糕分別係雲呢拿同朱古力味
