再玩一會 (旺角)
地址：旺角西洋菜南街180號捷利大廈1樓B室
電話：95108128
阿祖最愛樓上串燒店 #再玩一會 休息咗一段時間，最近終於重開喇😍再次開業新開始，店主決定以後親自上陣，upgrade返最好嘅食物品質！除咗堅持用新鮮靚料、真.牛油製作串燒，連肉類嘅切法、串法都好講究，100%燒而唔會先炸後燒，一食知高下🔥環境挺舒適、唔會有油煙味，冇限時可以傾計傾成晚～暫時只做booking，座位有限、記得提早Openrice或whatsapp訂位！
💕二人套餐 $388-$468
餐廳暫時以套餐為主，包晒以下食物+汽水兩罐，可加錢轉日本生啤🍺食材會跟時令更改！以下為$468套餐介紹，$388就由牛小排轉咗做純橡果級黑毛豚肋條🐽
🍢串燒
包括極佳級Prime牛小排🐮、純橡果級黑毛豚梅肉🐷、名古屋錦爽雞肉丸🐔、燒芝士竹輪卷🧀，每款有兩串！Prime牛小排具豐富大理石油花，入口先係濃郁油香，肉質堅實有咬口，肉味香濃同時不失肉汁！黑毛豚梅肉口感比想像中柔軟，唔會比牛肉失色，即使冇大量調味依然甘香。阿祖最喜歡芝士竹輪卷，比坊間嘅飽滿大粒、更加Q彈，滿滿流心芝士。雞肉丸味道有啲似雞軟骨串，加上燒汁帶出味道！
🥬️蔬菜
包括蒜香牛油燒茄子🍆、芝士牛油燒翠肉瓜🥒、及芝士牛油燒大啡菇🍄。一定要食、要試、要嗌呢度嘅大啡菇，好重要所以要講三次😂用上有機大啡菇、接近拳頭咁大隻，爆汁之餘一啲乾紋或渣都冇，非常出色！茄子同翠肉瓜亦燒得嫩身
🍗炸物
包括唐掦雞軟骨🐔、北海道蟹肉薯餅🦀。唐掦雞軟骨係餐廳招牌之一，大大碟香脆不油膩，更咗少許辣粉更加惹味，好啱送酒。蟹肉薯餅外層鬆脆炸皮夠薄身，新鮮炸起熱辣辣，不過唔算多蟹肉、以取其味為主 。 除咗set當然仲有散點食物，試咗名古屋錦爽雞翼 $26，雞全翼肉質嫩滑。整體而言食過咁多次、今次質素最好，食得出背後嘅心機同對食材堅持！
