大欖燒烤 (屯門)
地址：香港新界屯門大欖涌村385地段263號
電話：26131811
入秋最啱燒嘢食，前幾日就約咗朋友、book咗呢間黃店嘅流水蝦BBQ放題。燒烤場佔地超大，屯門公路轉車站行上去約15分鐘，可免費泊車！千祈唔好去咗元朗大欖🤣分為港式燒烤、串燒同流水蝦+串燒，記得訂位時講明想坐室內位置，咁就有得嘆冷氣🌬同大家詳細介紹
每位價格 (星期六日)
- 港式燒烤任食4小時$160，全日$180
- 串燒任食150分鐘$238
- 流水蝦+串燒任食150分鐘$348
- 每枱收取開爐費$50
流水蝦放題
每枱旁邊都有魚缸自己夾蝦🦐夾起後先放入冰水凍暈一陣，剪走鋏同腳就可以放上烤爐，燒到一半加少少鹽調味。大蝦非常新鮮，夾起時仲大力彈跳，每隻接近大半隻手板咁長✋肉質飽滿實淨！而且大蝦定期refill，唔會有冇嘢夾嘅情況出現
海鮮船
每枱贈送一隻海鮮船，包括蜆、鮑魚及蠔，份量跟人頭俾！海鮮質素屬中上水平，一讚蜆肉鮮味有肉汁
自助區
其他燒烤食物、串燒就自己出去攞，大約40幾款！自助區感覺都算企理，種類好多連雞翼都有6-7款🙌比較特別嘅有紐西蘭羊架、咸牛舌、雞軟骨、香蕉船等。特別推介咖哩魷魚、泰式雞肉串、川味雞翼、熔岩芝士杯、秘製蝴蝶雞全翼🤩無論再飽都要試蒜蓉法包，可以無限加牛油、蒜蓉同蜜糖，好肥但好正🥖不過肉類醃味偏鹹、要瘋狂飲嘢，自助區有一大個飲品櫃、款式同大路放題差不多，更外仲有一杯杯雀巢雪糕
環境
戶外燒烤場一定係偏熱，加埋人多，就算室內冷氣位都成陣油煙味。但整體環境乾淨整齊，店員勤力換炭，中秋節仲送月餅！由於10點就清場，臨走時音樂仲係咁播「係咁先啦」，大家跟住一齊唱氣氛超好🤣
